ପଥେ ପ୍ରାନ୍ତରେ । ମୃଣାଳ । ୬.୧୨.୨୦୨୦
ମଣିଷର ଶକ୍ତି
ତେବେ ଆଉ କେତେକ ଭାବନ୍ତି(ଏହାକୁ ଫେନୋମୋଲୋଜି ବୋଲି କହନ୍ତି) ଯେ, ଦେହର ମଧ୍ୟ, ଏମିତିକି ଦେହର ପ୍ରତ୍ୟେକ ଅଙ୍ଗପ୍ରତ୍ୟଙ୍ଗର ମଧ୍ୟ ବୁଦ୍ଧି ରହିଛି । ଅକ୍ଟୋପସର ଅନେକ ଗୋଡ଼ । ଏ ପ୍ରତ୍ୟେକ ଗୋଡ଼ର ନ୍ୟୁରନ୍ ରହିଛି ଏବଂ ଏହା ନିଜେ ସ୍ୱାଧୀନ ଭାବେ କାମ କରିପାରେ । ମଣିଷ ଦେହର ଅଙ୍ଗପ୍ରତ୍ୟଙ୍ଗର ମଧ୍ୟ ସେ ଶକ୍ତି ରହିଛି । ଉଦାହରଣ ସ୍ୱରୂପ, କାର୍ ଚଳାଇବାକୁ ଦେଖନ୍ତୁ । ଗୋଟେ କାର୍ ଚଳାଇବା ପାଇଁ ଦେହର ଅନେକ ଅଙ୍ଗପ୍ରତ୍ୟଙ୍ଗ ଏକାଠି କାମ କରିବା ଦରକାର; ଆଖି, ଦୁଇ ଗୋଡ଼, ହାତ ଆଦି । ସମାନ କଥା ସାଇକେଲ ଚଳାଇବା, ଟାଇପ୍ କରିବା କ୍ଷେତ୍ରରେ ମଧ୍ୟ କୁହାଯାଇପାରେ । ଅଙ୍ଗପ୍ରତ୍ୟଙ୍ଗଗୁଡି଼କ ଉପଯୁକ୍ତ ପ୍ରଶିକ୍ଷଣ ଏବଂ ଅଭ୍ୟାସରେ ନିଜେ ନିଜେ କାମ କରିବାର କ୍ଷମତା ହାସଲ କରିପାରନ୍ତି । ମସ୍ତିଷ୍କକୁ ଖୁବ୍ ବେଶି ଚିନ୍ତା କରିବାକୁ ପଡ଼େନାହିଁ । ଏହାକୁ କେତେ ଜଣ ଏମ୍ବଡିଡ୍ ଇଣ୍ଟେଲିଜେଣ୍ଟ ବୋଲି କହୁଛନ୍ତି । ସମ୍ପ୍ରତି ସାଇମନ ରବର୍ଟ ‘ଦ ପାୱାର ଅଫ୍ ନଟ୍ ଥିଙ୍କିଙ୍ଗ’ ପୁସ୍ତକ ଲେଖିଛନ୍ତି । ଏ ପୁସ୍ତକରେ ମଣିଷ ଦେହର ଅଙ୍ଗପ୍ରତ୍ୟଙ୍ଗ ଅଧିକ ବ୍ୟବହାର ଉପରେ ଅଧିକ ଗୁରୁତ୍ୱ ଦିଆଯାଇଛି ।
ବର୍ତ୍ତମାନ ସମୟରେ ଆର୍ଟିଫିସିଆଲ ଇଣ୍ଟେଲିଜେଣ୍ଟ, ମେସିନ ଲର୍ଣ୍ଣିଂ ଉପରେ ଗୁରୁତ୍ୱ ଦିଆଯାଉଛି । ନିଷ୍ପତ୍ତି ନେବା ପାଇଁ, ତଥ୍ୟର ଏକତ୍ରୀକରଣ ଏବଂ ବିଶ୍ଳେଷଣ ଉପରେ ଗୁରୁତ୍ୱ ଦିଆଯାଉଛି । ହେଲେ ସାଇମନ ରବର୍ଟଙ୍କ କହିବା କଥା, ଏଭଳି ଆହରିତ ତଥ୍ୟର ବିଶ୍ଳେଷଣ ଉପରେ ଆଧାରିତ ନିଷ୍ପତ୍ତି ସବୁବେଳେ ଠିକ୍ ହୋଇନପାରେ । ସଠିକ୍ ନିଷ୍ପତ୍ତି ପାଇଁ ମଣିଷ ସମାଜ ଭିତରକୁ ଯାଇ, ମଣିଷ ସହିତ ଯୋଗାଯୋଗ କରି ତା’କୁ ଲକ୍ଷ୍ୟ କରି ନିଷ୍ପତ୍ତି ନେବା ଦରକାର । ଆମର ନୀତି ନିର୍ଦ୍ଧାରକମାନେ ଏବଂ ପ୍ରଶାସକମାନେ ଏ ବିଷୟଟିକୁ ଭଲ ଭାବେ ବୁଝିବାର ଆବଶ୍ୟକତା ରହିଛି ।
ଶୌଚାଳୟ
ଆମେ ସ୍ୱଚ୍ଛ
ଭାରତ ବୋଲି ଯେତେ ଡିଂଗୁରା ପିଟୁ ନା କାହିଁକି, ଗାନ୍ଧୀଙ୍କ ଚଷମାକୁ ଥୋଇ ଯେତେ ବ୍ୟାନର ପୋଷ୍ଟର
ଲଗଉନା କାହିଁକି- ଅସଲ ସତଟା କଣ- ତାହା ଆପଣ ବସ୍ରେ ଦୂର ଜାଗାକୁ ଯାଆନ୍ତୁ ଜାଣିଯିବେ- ଯେତେବେଳେ
ଆପଣ ଝାଡ଼ା-ପରିଶ୍ରା ଯିବାକୁ ଚାହିଁବେ । ଆଉ ସାଂଗରେ ଯଦି ସ୍ତ୍ରୀଲୋକ ଥାନ୍ତି, ତେବେ ହାଡ଼େ ହାଡ଼େ
ଟେର ପାଇଯିବେ । କାରଣ, ଯେଉଁମାନେ ଶାସନରେ ଅଛନ୍ତି ସେମାନେ ବୋଧେ ଭାବନ୍ତି- ବସ୍ରେ ଯିବା ଆସିବା
କରୁଥିବା ଲୋକଙ୍କୁ ଝାଡ଼ାପରିଶ୍ରା ମାଡ଼େନି । ମାଡ଼ିଲେବି କେମିତି କଣ କରି ସେମାନେ ମ୍ୟାନେଜ୍ କରି
ନେବେ । ସେମାନଙ୍କ ପାଇଁ ସଫା ସୁତୁରା ଶୌଚାଳୟର କୌଣସି ଆବଶ୍ୟକତା ନାହିଁ । ଆମ ସହରମାନଙ୍କରେ ସାଧାରଣ
ବ୍ୟବହାର ପାଇଁ କେତୋଟି ଶୌଚାଳୟ ଅଛି- ଭାବନ୍ତୁ । ସ୍ମାର୍ଟ ସିଟି ଭୁବନେଶ୍ୱରର କେତୋଟି ରଂଗମରା
ଶୌଚାଳୟକୁ ଛାଡ଼ିଦେଲେ ଅଧିକାଂଶ ସହରରେ ସଫା ସୁତୁରା ଶୌଚାଳୟ ସଂଖ୍ୟ ହାତଗଣତି ।
ବାରିପଦାରୁ ପୁରୀ, ଭୁବନେଶ୍ୱରରୁ ଇଆଡ଼େ ସମ୍ବଲପୁର-
ସିଆଡ଼େ ବ୍ରହ୍ମପୁର- ଆମ ରାଜରାସ୍ତା କଡ଼ରେ କେତେଟା ସଫା ବ୍ୟବହାର ଯୋଗ୍ୟ ଶୌଚାଳୟ ଅଛି? ଆମ ବସ୍ଷ୍ଟାଣ୍ଡ୍ମାନଙ୍କରେ
ଶୌଚାଳୟ ନାଁରେ ଯାହା ଅଛି- ସେଥିରୁ କେତୋଟି ବ୍ୟବହାର ଉପଯୋଗୀ? ମାନନୀୟ ପରିବହନ ମନ୍ତ୍ରୀ ତାଙ୍କ
ସଚିବଙ୍କୁ ନେଇ ଥରେ ଯାଇ ଦେଖନ୍ତୁ।
ସମ୍ପୃକ୍ତ
ବିଭାଗ, ସରକାର ବା ସ୍ଥାନୀୟ ପ୍ରଶାସନ ଯଦି ଶୌଚାଳୟ ତିଆରି କରି ପାରୁନାହାନ୍ତି ବା ତାର ରକ୍ଷଣାବେଣକ୍ଷଣ
କରି ପାରୁନାହାନ୍ତି- ତେବେ ଗୋଟେ ଆଇଡିଆ ଦେଉଛି- ଗ୍ରହଣ କରି ପାରନ୍ତି । ଟୋଲ୍ଗେଟ୍କୁ ନିଲାମ
ଦିଆଯାଉଛି । ସେଇ ପ୍ରକ୍ରିୟାରେ ପ୍ରତ୍ୟେକ ଟୋଲ୍ ଗେଟ୍ ପାଖରେ ଶୌଚାଳୟ ନିର୍ମାଣ ଏବଂ ଏହାର ରକ୍ଷଣାବେକ୍ଷଣ
ନିଲାମର ଏକ ଶର୍ତ୍ତ ରହୁ । ଏବଂ ଏହାର ରକ୍ଷଣାବେକ୍ଷଣ ଦାୟିତ୍ୱ ନିଲାମ ନେଇଥିବା କମ୍ପାନିକୁ ଦିଆଯାଉ
। ତାହେଲେ ଅନ୍ତତଃ ଟୋଲ୍-ଗେଟ୍ ଗୁଡ଼ିକ ପାଖରେ ଶୌଚାଳୟ ମିଳିପାରିବ ।
ପ୍ଲାଷ୍ଟିକ୍ ଟବ୍ରେ ବୋଇତ ବନ୍ଦାଣ
ଏବର୍ଷ କରୋନା ମହାମାରୀ ପାଇଁ ବୋଇତ ବନ୍ଦାଣରେ ଭାରି କଟକଣା ଲାଗୁ କରାଗଲା । ଲୋକେ ଜଳାଶୟ ପାଖକୁ ଯେମିତି ନ ଯାଇ ପାରିବେ ସେଥିପାଇଁ ପୋଲିସ ଏ ଶୀତସକାଳେ ଯାଇ ପଇଁତରା ମାରିଲେ । କରୋନାକୁ ଡରି ହେଉ ବା ପୋଲିସକୁ ଡରି ହେଉ କିମ୍ବା ଶୀତ ସକାଳେ ବାହାରକୁ ନ ବାହାରିବାର ଭଲ ବାହାନା ମିଳିଗଲା ବୋଲି ହେଉ- ଅନେକେ ନଈ ପୋଖରୀ କୂଳକୁ ଗଲେନି । ହେଲେ ଓଡ଼ିଆ ତାର ସଂସ୍କୃତିକୁ ଭୁଲିବ କେମିତି! ବୋଇତ ଆଉ ପଛେ ନ ଯାଉ- ତା ସ୍ମୃତିଟାକୁ ଉଜାଗର କରି ରଖିବାକୁ ପଡ଼ିବ ।
ଛାଡ଼ଖାଇ ପାଇଁ ଶୁଖୁଆ
କାର୍ତ୍ତିକ
ପୂର୍ଣ୍ଣିମା, ବୋଇତ ବନ୍ଦାଣ ଇତ୍ୟାଦିରେ ଯେତେ ଲୋକଙ୍କର ଯେତେ ଶ୍ରଦ୍ଧା ତାର ଡବଲ୍ ଲୋକଙ୍କର ଡବଲ୍
ଶ୍ରଦ୍ଧା ହେଲା ଛାଡ଼ଖାଇରେ । ପଞ୍ଚୁକ ଚାଲିଥିଲାବେଳୁ ଛାଡ଼ଖାଇର ଯୋଗାଡ଼ ଚାଲିଥାଏ । ଖାସି-ବାଲାକୁ
ଆଗରୁ ବରାଦ । ମାଛ ବାଲାକୁ ଭଲ ଚିଙ୍ଗୁଡ଼ି ପାଇଁ ଆଗରୁ ଆଡ୍ଭାନ୍ସ୍ ଦେଇ ରେଡି ।
ଏବର୍ଷ ଦରଦାମ ହୁହୁ ହୋଇ ବଢ଼ିଛି । ଆଳୁ ପିଆଜ
ବି ସାଧାରଣ ପରିବାରୁ ଅସାଧାରଣ ସ୍ତରକୁ ଉଠି ଗଲେଣି
। ଏ ଟାଇମ୍ରେ ମୋ ଭଳିଆ ଲୋକ ମାଛ ମାଉଁସ କିଣିବ କେମିତି! ତ ଆମ ଭଳି ଲୋକଙ୍କ ପାଇଁ ରହିଛି ଶୁଖୁଆ
। କନ୍ଟେଣ୍ଟ୍ ନ ଥାଉ ଫ୍ଲେଭର ଜୋର । ଘରେ ଶୁଖୁଆ ରାନ୍ଧିଲେ ସାହି ଯାକ ଲୋକ ଜାଣିବେ ଘରେ ଆଇଁଶ
ହୋଇଛି । ଆଉ ସକାଳେ ଚାଇଁ ପଖାଳ ସହିତ ଶୁଖୁଆ ଭଜା- ମାନେ ବ୍ରେକ୍ଫାଷ୍ଟ୍ରୁ ଛାଡ଼ଖାଇ । ମାଡ଼ିଚାଲ
।
ସେ୍ୱଟର
ଆଠ ନ ମାସ
ହେଲା, ତମେ ମୋତେ ଅଣଦେଖା କରିଛ । ମୋତେ ନିଜଠାରୁ ଦୂରେଇ ଦେଇଛ । ଆଉ ପାରିବନି । ଆଜି ନ ହେଲେ କାଲି
ମୋତେ ତୁମେ ନିଶ୍ଚୟ ପାଖକୁ ଟାଣିନେବ । ଆଲିଂଗନ କରିବ ।
ଇତି ।
ତମର ଟ୍ରଙ୍କ୍ ଭିତରେ ଥିବା ତମର ପୁରୁଣା ସେ୍ୱଟର ।
ବାପା-ପୁଅ ସମ୍ବାଦ
ପୁଅ: ବାପା, ''ତମସୋ ମା ଜ୍ୟୋତିଃର୍ଗମୟ''ର ମାନେ କଣ ଜାଣିଛ?
ବାପା : ନାଇଁ, ତୁ କହ....
ପୁଅ: ମାନେ ହେଲା, ଲାଇଟ ପଳେଇଲେ ଏଇ ପ୍ରେୟାର ଗାଇଲେ ଲାଇଟ ପଳେଇ ଆସିବ
ଗୁରୁଜ୍ଞାନ
ଯିଏ କାମ
କରିବାକୁ ନ ଚାହେଁ, ସେ ବାହାନା ଖୋଜେ । ଶାସ୍ତ୍ର କହୁଛି- ଯିଏ ଯାହା ମନପ୍ରାଣ ଦେଇ ଖୋଜେ ସେ ତାହା
ପାଏ । ତେଣୁ କାମ କରିବାକୁ ଚାହୁଁ ନଥିବା ଲୋକ ପାଇଁ, କର୍ମକୋଢ଼ି ପାଇଁ ହଜାରେ ବାହାନା ମିଳିଯାଏ
। କେତେକ ସେମାନେ ଖୋଜି ନିଅନ୍ତି, କେତେକ ଆପେ ଆପେ ଉଭା ହୋଇଯାଏ ।
***
No comments:
Post a Comment