ପଥେ ପ୍ରାନ୍ତରେ । ମୃଣାଳ । ୧୪.୬.୨୦୨୦
କରୋନା ବ୍ୟାପିବାର
୨୧୦ ଦିନ ପରେ...
କରୋନା ଭାଇରସ୍ ପୃଥିବୀକୁ ଆସିଛି ବୋଲି ଜାଣିବାର ଦିନ ଥିଲା ଜୁନ ୪ ତାରିଖ। ଗତ ବର୍ଷ ନଭେମ୍ବର ୧୭ ତାରିଖରେ ଚୀନ୍ର ଉହାନ୍ରେ ଏମିତି ଏକ ଭାଇରସ୍ର ଅବସ୍ଥିତି ବିଷୟରେ ଜଣା ପଡ଼ିଥିଲା । ମାତ୍ର ୧୦୦ ଦିନ ଭିତରେ ଏ ଭାଇରସ୍ ସାରା ପୃଥିବୀରେ ସଂଚରି ଯାଇ ଏକ ମହାମାରୀର ରୂପ ନେଇଥିଲା । ୨୦୦ ଦିନ ଭିତରେ ଏହା ସାରା ପୃଥିବୀରେ ମଣିଷର ଜୀବନ ଶୈଳୀକୁ ବଦଳାଇ ଦେଇଛି । ବଦଳାଇ ଦେଇଛି ବ୍ୟବସାୟ ବାଣିଜ୍ୟ, ଶିକ୍ଷା, ମନୋରଂଜନ, କ୍ରୀଡ଼ା ଓ ପର୍ଯ୍ୟଟନର ରୂପରେଖ । ପୃଥିବୀର ଅର୍ଥନୈତିକ ଅଭିବୃଦ୍ଧିର ହାର ଆଶଙ୍କାଜନକ ଭାବେ କମିଯାଇଛି । ଅର୍ଥନୈତିକ ସମସ୍ୟା ସହିତ ଏବଂ ଅନେକାଂଶରେ ଏହା ଫଳରେ ଅନେକ ସ୍ଥାନରେ ସୃଷ୍ଟି ହେଉଛି ସାମାଜିକ ସମସ୍ୟା । ଏ ଭାଇରସ୍ର ଟୀକା ବା ଏହା ହେଲେ ଭଲ କରିବାର ଔଷଧ ବାହାରିବାକୁ ଆହୁରି ବହୁତ ଡେରି ଲାଗିବ ବୋଲି କହୁଛନ୍ତି ବୈଜ୍ଞାନିକମାନେ । ତେଣୁ କରୋନା-ଜନିତ ଏ ଅବସ୍ଥା ଆହୁରି ବେଶ କିଛି ମାସ ଲାଗିରହିବ ।
ଇଏ ଏକ ନୂତନ ଜୀବନ । ଏହାକୁ ନୂତନ-ସ୍ୱାଭାବିକ ଜୀବନ- ନିଉ ନର୍ମାଲ୍ ଜୀବନ ବୋଲି କୁହାଯାଉଛି । ଆମେ କଣ ଏ ଜୀବନ ସହିତ ଖାପ୍ ଖୁଆଇ ଚଳିପାରିବା?
ପ୍ରାଣୀ-ବିଜ୍ଞାନ ଏବଂ ମନସ୍ତତ୍ୱ-ବିଜ୍ଞାନ କହେ ମଣିଷ ପରିବର୍ତ୍ତିତ ପରିସ୍ଥିତି ସହିତ ଖୁବ ଶୀଘ୍ର ଖାପ୍ ଖୁଆଇ ନେଇପାରେ । ଏହା ମଣିଷର ବିଶେଷତ୍ୱ । ହୁଏତ କରୋନା-ପର ଜୀବନ ସହିତ ଆମେ ଖାପ୍ ଖୁଆଇ ନେବା । ହୁଏତ ବାହାରକୁ ବାହାରିଲାମାତ୍ରେ ମୁଖା ପିନ୍ଧିବାଠୁଁ ସମସ୍ତଙ୍କଠୁଁ ଦୁଇ ଗଜ ଦୂରେଇ ରହିବା, ଦିନିକିଆ କ୍ରିକେଟ୍କୁ ଷ୍ଟାଡିଅମ୍ରେ ନ ଦେଖି କେବଳ ଟିଭି ପରଦାରେ ଦେଖିବା, ବାହାଘର ରିସେପ୍ସନ୍ରେ ଏକାଠି ଭୋଜି ନ ଖାଇ ଖାଦ୍ୟ-ପ୍ୟାକେଟ୍ ଧରି ଘରକୁ ଆସିବା, କ୍ଲାସ୍କୁ ନ ଯାଇ ଅନ୍ଲାଇନ୍ରେ ଭରଚୁଆଲ୍ ପାଠ ପଢ଼ିବା, ସିନେମା ହଲ୍ରେ ସିନେମା ନ ଦେଖି ଏକୁଟିଆ ମୋବାଇଲ୍ରେ ସିନେମା ଦେଖଇବା, ମଲ୍ରେ ପାଞ୍ଚ ଜଣଙ୍କ ସହିତ ମିଶି କିଣାକିଣି ନ କରି ଅନ୍ଲାଇନ୍ରେ ଜିନିଷ ପତ୍ର କିଣିବା ଆମର ଅଭ୍ୟାସ ହୋଇଯିବ । ଅଭ୍ୟାସ ହୋଇଯିବ ସାଂଗମାନଙ୍କ ସହିତ ମସ୍ତି କରିବା, ଖେଳ ପଡ଼ିଆରେ ଫୁଟ୍ବଲ୍ ଖେଳିବା । ଆମ ପିଲାମାନେ ଭୁଲିଯିବେ ଅଜା କି ଆଈ ଛାତି ମୁହଁରେ ଗୁଂଜି ଅସୁର ଅସୁରୁଣୀ ଗପ ଶୁଣିବା । ଯୁବକ ଯୁବତୀମାନେ ବୋଧେ ଚୁମ୍ବନ ବି ଭୁଲିଯିବେ । ସହବାସ ବେଳେ ବି ମୁଖା ପିନ୍ଧିବାକୁ ପରାମର୍ଶ ଦେଲେଣି କେତେଜଣ ଚିକିତ୍ସାବିଜ୍ଞାନୀ । ବାସ୍ତବଜୀବନରେ ପାଖକୁ ଆସିବେନି କେହି । ପାଖକୁ ଆସିବେ ଭରଚୁଆଲ୍ ୱାର୍ଲଡରେ । ଶୂନ୍ୟ-ଜଗତ । ଇଏ ଏକ ଅଦ୍ଭୁତ ଜଗତ । ସମ୍ପୂର୍ଣ୍ଣ କଳ୍ପନାର କଳ୍ପ ଜଗତ ନୁହେଁ । ବାସ୍ତବ ଜଗତ ବି ନୁହେଁ । କଳ୍ପନାହୀନ ଅଧା ବାସ୍ତବ । ଏକ ପରା-ଜଗତ । ଦେଖିପାରିବ । ଛୁଇଁ ପାରିବ ନାହିଁ । ଶୁଣି ପାରିବ । ଆଘ୍ରାଣ କରି ପାରିବ ନାହିଁ ।
ଏମିତି ଏକ ଜଗତରେ ବାସ କରିବାକୁ କେମିତି ଲାଗିବ ଆମକୁ? ଯେତିକି ଭାବୁଛି- ସେତିକି ଅଜବ ଲାଗୁଛି । କେବେ ଭାବି ନଥିଲି ଏମିତି ଏକ ସମୟ ଆସିବ । ଆସିଛି- ଏବେ ତାକୁ ଗ୍ରହଣୀୟ କରି ନେବାକୁ ପଡ଼ିବ । ସମୟର ଚାହିଦା ସହିତ ଆମକୁ ବଦଳିବାକୁ ପଡ଼ିବ ।
ଅନ୍ଲାଇନ ଶିକ୍ଷାଦାନ
କରୋନା ସଂକ୍ରମଣରୁ ଦେଶକୁ ବଞ୍ଚାଇବା ପାଇଁ ଲକ୍ଡାଉନ କରାଯାଇଛି । ସାମାଜିକ ଦୂରତା ଉପରେ ଯୋର ଦିଆଯାଉଛି । ଶିକ୍ଷାନୁଷ୍ଠାନ, ଅଫିସ୍ ଇତ୍ୟାଦି ବନ୍ଦ କରାଯାଇଛି ।
ଏହା ଅଫିସ୍ କର୍ମଚାରୀ ଓ ବିଶେଷ କରି ଛାତ୍ରଛାତ୍ରୀଙ୍କ ପାଇଁ ଏକ ବଡ଼ ସମସ୍ୟା ସୃଷ୍ଟି କରିଛି । ଲକ୍ଡାଉନ ଯେତେବେଳେ ଆରମ୍ଭ କରାଗଲା- ସେତେବେଳେ ଅନେକ ସ୍କୁଲରେ ନୂଆ ପାଠ୍ୟକ୍ରମ ଆରମ୍ଭ ହେବାର ଥିଲା । କଲେଜ, ବିଶ୍ୱବିଦ୍ୟାଳୟରେ ସେ ବର୍ଷର ପାଠପଢ଼ା (କୋର୍ସ) ଶେଷ ହେବାର ଥିଲା ।
କିଛି ଦିନ ମଧ୍ୟରେ ପରୀକ୍ଷା ହୋଇଥାନ୍ତା ହେଲେ ଏହି ସମୟରେ ସ୍କୁଲ, କଲେଜ, ଶିକ୍ଷାନୁଷ୍ଠାନ ବନ୍ଦ ହେବାରୁ ଶିକ୍ଷାଦାନରେ ବଡ଼ ସମସ୍ୟା ସୃଷ୍ଟି ହୋଇଛି । ଏମିତି ସମୟରେ ଅନ୍ଲାଇନ କ୍ଲାସ୍, ଓ ୱେବନାର ଶିକ୍ଷାଦାନ ଏକ ବଡ଼ ସାଧନ ଭାବେ ଉଭା ହୋଇଛି ଗୁଗୁଲ କ୍ଲାସ, ଗୁଗୁଲ ମିଟ୍, ଜୁମ୍ ଆପ୍, ୱେବଏକ୍ସ ଇତ୍ୟାଦି ସଫ୍ଟୱେର ଏ କ୍ଷେତ୍ରରେ ବେଶ୍ ଉପଯୋଗୀ ହୋଇପାରିଛି ।
ଅନେକ ସ୍କୁଲ, କଲେଜ, ବିଶ୍ୱବିଦ୍ୟାଳୟ, ଉଚ୍ଚତ୍ତର ଶିକ୍ଷାନୁଷ୍ଠାନ ଏହାକୁ ବ୍ୟବହାର କରୁଛନ୍ତି । ଖୁବ୍ କମ୍ ସମୟ ମଧ୍ୟରେ ଅନ୍ଲାଇନ ଶିକ୍ଷା ପଦ୍ଧତି ବେଶ୍ ପ୍ରଚଳିତ ହୋଇଛି ।
ଏହା ପାରମ୍ପରିକ ଶ୍ରେଣୀ କକ୍ଷର ବିକଳ୍ପ ନ ହେଲେ ବି ବହୁ ଅଂଶରେ ପାରମ୍ପରିକ ଶିକ୍ଷାଦାନର ଅଭାବକୁ ଦୂର କରିପାରୁଛି ।
କିନ୍ତୁ ଅନ୍ଲାଇନ୍ କ୍ଲାସରେ ଆମର ଅନଭିଜ୍ଞତା ଯୋଗୁଁ ହେଉ ବା ଏଥିରେ ବ୍ୟବହାର ହେଉଥିବା କାରିଗରି ଜ୍ଞାନ ଓ ଯନ୍ତ୍ର ବ୍ୟବହାରରେ ଅନଭିଜ୍ଞତା ଯୋଗୁଁ ହେଉ ଏଥିରେ କିଛି ଅସୁବିଧା ଦେଖା ଦେଉଛି ।
ଅନ୍ଲାଇନ୍ ଶିକ୍ଷାଦାନ କିଭଳି ଆହୁରି ଫଳପ୍ରଦ ହୋଇପାରିବ ସେ ବିଷୟରେ ଢେଙ୍କାନାଳସ୍ଥିତ ଭାରତୀୟ ଜନ ସଂଚାର ସଂସ୍ଥାନ ନିକଟରେ ଏକ ଷ୍ଟାଣ୍ଡାର୍ଡ ଅପେରେଟିଂ ପ୍ରସିଡିଅର- ମାନକ ସଞ୍ଚାଳନ ପଦ୍ଧତି ତିଆରି କରିଛନ୍ତି । ସେଥିରେ କେତେଗୁଡ଼ିଏ କଥା କୁହାଯାଇଛି ଯାହା ଏ କ୍ଷେତ୍ରରେ ଅତ୍ୟନ୍ତ କାର୍ଯ୍ୟକର ହୋଇପାରେ ।
କରୋନା କାଳରେ କେତୋଟି ସାଉଁଟା କବିତା
କରୋନା କହୁଛି: ଘରେ ରହ
ଭୂମିକମ୍ପ କହୁଛି: ବାହାରକୁ ଯା
ମୋତେ ଲାଗୁଛି, ଈଶ୍ୱର କହୁଛନ୍ତି:
ଛାଡ଼ ବାବୁ ସବୁକିଛି, ମିଛ ମାୟା ସଂସାର
ଆ, ଉପରକୁ ଆ ।
**
ଆକାଶରେ ଅମ୍ଫାନ୍, ପରେ ପରେ ପଙ୍ଗପାଳ
ପାତାଳରେ ଭୂମିକମ୍ପ
ଚାରିପାଖରେ କରୋନା
ତିନି ଲୋକରେ ଯାତନା ହିଁ ଯାତନା ।
ତ ଏବେ ଭାବନା...
ମଣିଷ ଯିବ କଉଠି?
ଆତ୍ମନିର୍ଭର
ଆମ ନବଘନ ବାବୁ ଭାରି ଆତ୍ମନିର୍ଭର ମଣିଷଟିଏ ।
ନିଜ ପିଠି ବି ସେ ନିଜେ ଥାପୁଡାଇ ଦିଏ ।
(ସୌଜନ୍ୟ: ତ୍ରୟମ୍ବକ ଶର୍ମା, ସଂପାଦକ, କାର୍ଟୁନ୍ୱାଚ୍)
ଓକେ, ଟେଷ୍ଟେଡ୍
କରୋନା, ଚୀନ୍, ଅମ୍ଫାନ, ଭୂକମ୍ପ,ପଙ୍ଗପାଳ, ମାନ୍ଦା ଅବସ୍ଥା... ଏସବୁ ପରେ ଯିଏ ବଞ୍ଚି ରହିବ- ତାରି ମୁଣ୍ଡରେ ଷ୍ଟାମ୍ପ୍ ଲଗାଯିବ- କ୍ୱାଲିଟି ଚେକ୍ଡ, ଓକେ, ଟେଷ୍ଟେଡ୍ ।
(ସୌଜନ୍ୟ: ସାମାଜିକ ଗଣମାଧ୍ୟମ)
No comments:
Post a Comment